No one is born to be a champion. It can only be earned.

Bahagi lamang ito ng pahayag ni Pau Rabil, isang sikat na American sports executive at retired professional lacrosse player kung sino at ano ang katangian ng isang tunay na kampeon. Taong 2006, inilathala ni Rabil ang kanyang librong may pamagat na “The Way of the Champion.” Laman ng librong ito ang mga naging karanasan ni Rabil bago siya nakilala bilang isa sa ‘greatest lacrosse player of all time’ sa kanyang bansa. Ipinauunawa niya sa mga mambabasa kung paano maging matapang at magkaroon ng tamang disiplina upang maging isang tunay na kampeon. Mula sa kapatagan ng Badoc, Ilocos Norte, isang Ilokano ang dalawang beses na tumuntong sa national stage.

CARAnasang ‘di pangCARAniwan

Nasa 30 minuto na ang nakalilipas nang lumipad ang eroplanong sinasakyan ni Rhommel. Tumingin siya sa labas ng bintana at pinagmasdan ang mga ulap. Parang kailan lang noong nakatingala siya sa langit at pinagmamasdan ang mga eroplano mula sa kanyang kalabawan. Ngayon, siya na mismo ang nasa eroplano at kasama pa ang kanyang misis na pupuntang Cebu upang dumalo sa pagdiriwang ng 9th National Carabao Conference.

Sa loob-loob ni Rhommel, naniniwala siya na ang mga magagandang karanasan ay produkto ng pagsisikap.

“Sa pag-aalaga pala ng kalabaw ako makararanas ng mga biyaya na hindi ko inakalang makakamit ko,” saad ni Rhommel.

Si Rhommel ay dating magsasaka ng tabako at palay. Nguni’t para sa kanya ay hindi ito naging sapat dahil sa mababang presyo at ang kumikita ay mga middleman at buyer. Pero likas kay Rhommel ang pagiging isang madiskarteng ama dahil nag-aalaga siya ng kambing at manok para may ibebenta habang hinihintay ang panahon ng anihan.

“Napinpintas ti dairy (mas maganda ang dairy) dahil kita dito ay daily,” pagpapatunay niya.

Nagsimulang mag-alaga si Rhommel ng kalabaw na native noong 2011. Taong 2017, nang maipakilala sa kanilang bayan ang programang AI.

Ayon sa kanya, sa simula ay hindi pa buo ang kanyang pasya na sumubok ng AI pero ‘di naglaon ay nakumbinse rin siya dahil hindi siya tinantanan ng AI technician ng DA-PCC sa MMSU.

Noong 2021, tuluyang naranasan ni Rhommel na gumatas ng mas marami kaysa sa kanyang inaasahan.

Sa tulong ng DA-PCC sa MMSU at sa pagsisikap ni Rhommel at ng kanyang pamilya, kumita siya ng humigit sa PHP60,000 noong 2021.

“Tuluy-tuloy na akong nakapagbibigay ng allowance sa mga anak kong nag-aaral. ‘Yung natanggap kong cash prize noong NCC na PHP55,000 ay ipinambili ko ng tricycle at motor,” pagbabahagi ni Rhommel.

Sa kasalukuyan, si Rhommel ang nag-iisang magkakalabaw na naggagatas sa Badoc. Isa sa kanyang pangarap ang makatulong upang maparami ang bilang ng mga maggagatas sa kanilang lugar

Formula ng isang kampeon na magkakalabaw

“Mahusay na pagpapakain!”

Ito, ayon kay Rhommel ang dahilan kung bakit dalawang beses niyang nakamit ang championship title sa pinakamahuhusay na kalabaw sa NCC.

Ang kanyang mga kalabaw ay taun-taon kung manganak at consistent din ito sa pagbibigay ng maraming gatas.

Ayon sa Dairy Buffalo Production Handbook, mayroong anim na mahalang nutrients na kailangang pagtuunan sa pag-aalaga ng buffalo: carbohydrates, protein, fats, minerals, bitamina, at tubig.

Ang mga karaniwang pinagmumulan ng mga nutrients na ito ay sa silage, legume hay, damo, crop residues, molassess, soybean, concentrates, urea, at marami pang iba.

Sa karanasan ni Rhommel, ang pagpapakain niya ng ipil-ipil at gabi ang nakatulong sa kanyang mga alaga na magkaroon ng magandang pangangatawan at mataas na produksyon ng gatas.

Kung bubuklatin ni Rhommel at babalikan ang mga nakaraang pahina ng kanyang naging paglalakbay sa pagkakalabaw, hindi maitatangging ang unang hakbang upang maging isang kampeon ay ang sumubok nang walang pag-aalinlangan.