Sa abalang lungsod ng Metro Manila kung saan maraming mga sikat na negosyo at produkto ang nagsisilabasan, isang natatanging kwento at panlasa ang naiiba — ang Karabella. Isa itong lokal na negosyong may layuning ipagmalaki ang lasang Pinoy gaya ng gatas at karne ng kalabaw sa buong mundo.

Nagsimula ang Karabella noong 2017 bilang isang simpleng proyektong may layuning tumulong sa mga magkakalabaw sa Gawad Kalinga Enchanted Farm. Ang kanilang naging unang produkto ay pastillas de leche — matamis, malambot, at puno ng purong gatas ng kalabaw. Nguni’t hindi pa roon nagtapos ang kanilang pangarap.

"Nais naming makagamit ng mas maraming gatas ng kalabaw para mas marami kaming matulungang magsasaka," ani ng tagapagtatag ng Karabella na si Eric Jan Buenaflor. Kaya't nabuo ang kanilang gelato na gawa sa gatas ng kalabaw.
Ayon sa mga parukyano, iba ang Karabella gelato. Sa unang tikim pa lamang, mararamdamang ito’y may sariling lasa—mas malapot at may natural na tamis na tatatak sa panlasa. Ginagamit lamang nila ang lokal at natural na sangkap, walang halong preservative o artipisyal na pampalasa.

Hindi lang gatas, karne pa

Hindi lamang gatas ang ipinagmamalaki ng Karabella. Nagbebenta na rin sila ng karne ng kalabaw—patunay na hindi lang pangkusina ang karneng ito, kundi pang-industriya pa.

“Karaniwan, pag sinabing karne ng kalabaw, iniisip ng tao na matigas. Pero hindi,” paglilinaw ni Eric Jan. “Kapag ginawa naming sausage o giniling para sa bolognese, malambot ito, malasa, at masustansya pa.”
Gamit ang inspirasyong ito, isinama nila ang carabao beef sa kanilang mga rice meals, pasta, at appetizer — lahat ng ito ay hinangaan ng kanilang mga customers. May mga nagsasabing, “Akala ko matigas 'yong carabao beef, pero ang lambot pala!” Laging may elementong surpresa, laging may dahilan para bumalik.

Sa dulo ng lahat ng ito, isang bagay ang sigurado: sa bawa’t scoop ng kanilang gelato, sa bawa't serving ng carabao beef bolognese, at sa bawa’t tasang gatas na may pagmamahal, dama ang layunin ng Karabella — ang ilapit sa bawa't Pilipino ang masarap, masustansya, at makabayang lasa ng gatas at karne ng kalabaw.

Eric Jan Buenaflor, Karabella Dairy Owner

Lasa na may malasakit

Hindi basta-basta ang paggawa ng menu sa Karabella. Bawa’t putahe ay dumaan sa panlasa at puso ng mismong may-ari. “Hindi ako gumagawa ng pagkain na hindi ko rin kakainin,” aniya. Kaya’t bawa't sangkap, bawa't serving, at bawa't presyo ay maingat na pinili at pinagdesisyunan—para sa kalidad, hindi lang para sa kita.

Ang kanilang tagumpay? Hindi lang nasusukat sa dami ng branches, kundi sa dami ng pusong naaantig. “Gusto kong maging parte ng araw-araw ng customers namin. 'Yong tipong, 'Gusto kong mag-kape — tara sa Karabella. Gusto ko ng dessert — may gelato sila. Gusto ko ng masustansyang karne — may carabao beef sila,” ani Eric Jan.

Mula sa kanilang unang branch sa Robinsons Manila hanggang sa SM North Edsa sa Quezon City, dala ng Karabella ang iisang pangarap: ang itanghal ang kayamanang lokal ng Pilipinas, lalo na ang mga produktong mula sa kalabaw.

Habang bukas sila sa posibilidad ng expansion, ngayon ay nakatutok sila sa pagpapahusay ng serbisyo, produkto, at karanasan ng bawa’t customer. “Gusto muna naming perpektuhin ito bago namin i-expand sa ibang lugar,” aniya. 

Sa dulo ng lahat ng ito, isang bagay ang sigurado: sa bawa’t scoop ng kanilang gelato, sa bawa't serving ng carabao beef bolognese, at sa bawa’t tasang gatas na may pagmamahal, dama ang layunin ng Karabella — ang ilapit sa bawa't Pilipino ang masarap, masustansya, at makabayang lasa ng gatas at karne ng kalabaw.

Kaya sa susunod na hanap mo ay hindi lang pagkain kundi karanasang puno ng puso at lasa, alam mo na kung saan pupunta. Tikman ang Karabella — ang gatas at karne ng kalabaw na tunay na nakabubusog, nakatutuwa, at nakabibilib.